حالة والدي تستعدي مستشفي

السؤال

والدي بقاله سنين طويلة ..تقريبا من قبل ما اتولد ٣٢ سنة وبتجيله حالة عصبية غريبة فجأة ويوميا بيقول كلام مش كويس خالص ويزعق في أي حد ويصرخ ويعلي صوته ويفتكر حاجات حصلت من سنين طويلة ومواقف تافه ويزعق عليها واى حد يحاول يهديه أو يتكلم معاه بيتجنن اكتر ..

 

والحل الوحيد اننا نبعد عنه بدل ما يأذي اى حد فينا لان إللى بيقف قصاده وقتها بيصب غضبه عليه هو ..ممكن مثلا يشتم يضرب ممكن يعمل اى حاجة مجنونة ..

ويفضل كده ساعة ساعتين تلاتة واوقات ليلة كاملة وبعدين فجأة يغني وكأن مفيش حاجة حصلت ويضحك ويكون رايق جدا وهادي ويشغل الراديو أو التلفزيون ويغني اغاني قديمة وكأن مفيش حاجة حصلت خالص..

 

المهم هو حاليا حالته الصحية تعبانة جدا وجاتله جلطة وفقد بصره بعد فشل زرع القرنية وعنده مشكلة كبيرة في ضغط العين والحالة العصبية ده بتزيد سوء وحاليا بقى بيصرخ اضعاف قبل كده حالة زى الهستيريا ..

 

احنا اتكلمنا كتير معاه انه محتاج علاج نفسي عصبي لكنه رفض ووالدتي برده رفضت وفيه طبيب نفسي شافه قريب بالعافية وكاتبله مهدئ قوي وقال محدش يعرفه انه بياخده وقال ضروري ياخده لكن للاسف والدتي عرفته انه بياخد مهدئ وقالت انه المهدئ أصلا مش جايب نتيجة معاه ..

 

انا حاسة ان ماما اتعودت على الوضع ده خلاص مع انها في نفس الوقت منهارة وتعبانة لانه على مدار سنين جوازهم وهو بيأذيها بحالته ده ..يعني وقت الحالة ده بيصب غضبه كله عليها هى الأول وهى بتعترف انها عايشة في جحيم بسبب الحالة ده .. احنا بجد مش فاهمين ماما … يعنى منين تعبانة ومنين سايباه كده وهى دكتورة كمان وعارفة كويس ان فيه حاجة غلط ..

 

دلوقتي بقى .. نعمل ايه علشان نسيطر عليه؟ ايه الإجراءات إللى نمشي فيها ؟ ازاى نقنع ماما انها تسيبه يتعالج ؟

 

و هل حالته كده تحتاج مستشفى نفسية؟

ولا كده حرام علينا؟ ما هو المجتمع إللى عايشين فيه بيعتبروا ان اى علاج نفسي لحد من الوالدين عقوق وكده ..

 

انا آخر مرة كلمت ماما فيها جالي احساس انه ممكن يأذيها أو هى مش هتقدر تستحمل ..انا خايفة عليها اوى ..وكمان فيه أحفاد واوقات بيصادف انهم بيشوفوا بداية النوبة ده ..قبل ما نبعدهم خالص..

 

وكمان انا طول طفولتي تقريبا عايشة في اوضتي بسبب حالته ده .. وبعدت عنه فترة لسفري بره مصر وسكنت في محافظة بعيدة عنه ..بقيت حاسة اني مش عايزة اشوفه كتير …لما بشوفه في الحالة ده حالتي النفسية بتنتكس جدا …بحس بكمية طاقة سلبية رهيبة وبكون عصبية جدا ومتوترة مع ولادي.. مع ان في وقت هدوئه بحس انه حنين جدا وطيب ..

 

.مجرد مكالمة كل فترة بطمن عليه .. بس هو برده اذاني جدا فترة طويلة ومسكني فترة في غضبه الهستيري ده..فهل كده عقوق مني ؟ ولا عادي؟

 

هو كل فترة لازم يمسك شخصية فينا يصب عليها غضبه ..

 

بمعني لازم يجلد إللى قدامه…يمسك أسوأ حاجة ما بيحبهاش الشخص في نفسه ويفضل يحفل عليها وكل المواقف السيئة…الإخفاقات برده نفس الفكرة ..

 

انا مش عارفة اوصف الحالة بس هى لما بتجيله بيكون واحد شكله شرير ووشه بيحمر وعروقه بتطلع وبيعرق جدا ومرعب جدا

 

ياريت تنصحوني..

0
Ala a 7 أشهر 0 الاجابات 216 مشاهدات 0

‫اضف اجابة

تصفح
تصفح